အီတလီ၊ ယူကရိန်းတို့နဲ့ ကစားရမယ့် ယူရို-၂၀၂၄ ခြေစစ်ပွဲအတွက် အင်္ဂလန်အသင်းလူစာရင်းကို နည်းပြဂါရတ်ဆောက်ဂိတ်က ထုတ်ပြန်ကြေညာလိုက်ရာ ထုံးစီအတိုင်း ပါသင့်သူတချို့ မပါဝင်လာဘူး၊ အရည်အချင်းမရှိသူတွေ ရွေးချယ်ခံထားရတယ်စသဖြင့် ဝေဖန်သံတွေ ဆူညံနေပါတယ်။
ဂိုး- ဂျော်ဒန်ပစ်ဖို့၊ နစ်ခ်ပုပ်၊ အာရွန်ရမ်စ်ဒေးလ်။
နောက်တန်း- ဘန်ချီဝဲလ်၊ အဲရစ်ဒိုင်ယာ၊ မာ့ခ်ဂွီဟီ၊ ရိစ်ဂျိမ်းစ်၊ ဟာရီမက်ဂွိုင်းယား၊ လုခ်ရှော၊ ဂျွန်စတုန်းစ်၊ ကီရန်ထရစ်ပီယာ၊ ကိုင်လီဝေါ်လ်ကာ။
ကွင်းလယ်- ဂျုဒ်ဘယ်လင်ဂမ်၊ ကော်နာဂါလာဂါ၊ ဂျော်ဒန်ဟန်ဒါဆန်၊ ဂျိမ်းစ်မက်ဒီဆွန်၊ မေဆန်မောင့်၊ ကယ်ဗင်ဖီးလစ်၊ ဒီကလန်ရိုက်စ်။
ရှေ့တန်း- ဖီးလ်ဖိုဒန်၊ ဂျက်ဂရီးလစ်ရှ်၊ ဟာရီကိန်း၊ မားကပ်စ်ရက်ရှ်ဖို့ဒ်၊ ဘူကာယိုဆာကာ၊ အိုင်ဗန်တိုနေး။ ဒီလူစာရင်းဟာ ခါတိုင်းထက်စာရင် မျှတတဲ့ရွေးချယ်မှုများ တွေ့ရှိရပေမယ့် ဆောက်ဂိတ်ရဲ့ နားမလည်နိုင်စရာ ဆုံးဖြတ်ချက်တချို့ကိုလည်း သတိပြုမိပါတယ်။
အင်္ဂလန်ပရိသတ်တွေဟာ ယူနိုက်တက်မှာ နေရာပျောက်နေတဲ့ မက်ဂွိုင်းယားကျတော့ပါဝင်လာပြီး အေစီမီလန်နဲ့အတူ ကွာတားဖိုင်နယ်ပူပူနွေးနွေးတက်ထားတဲ့ ဖီကာယိုတိုမိုရီအပေါ် အရင်တုန်းကလိုပဲ ချန်လှပ်ထားတဲ့ဆောက်ဂိတ်အပေါ် ဝိုင်းဝန်းမေးခွန်းထုတ်နေကြပါတယ်။
တစ်ဖန် မက်ဂွိုင်းယားနည်းတူ ခြေစွမ်းပျောက်ဆုံးပြီး ချဲလ်ဆီးရဲ့အရံလူစာရင်းမှာတောင် မပါဝင်နိုင်ခဲ့တဲ့ မေဆန်မောင့်ကိုမျက်နှာသာပေးခဲ့ပေမယ့် ဘရိုက်တန်နဲ့အတူ ခြေစွမ်းကောင်းတွေပြသနေတဲ့ ဆိုလီမာ့ရှ်ကို အခွင့်အရေးမပေးမှုအပေါ် ဝိုင်းတုပ်နေကြပြန်တယ်။
ထိုနည်းတူ ခံစစ်မှာ နောက်ထပ်ဘရိုက်တန်ကစားသမားတစ်ဦးဖြစ်သူ လူးဝစ်ဒန့်ကို ထည့်သွင်းသင့်ကြောင်း ထောက်ပြနေကြတယ်။ ဆောက်ဂိတ်ရဲ့လူရွေးချယ်မှုဟာ International break တစ်ခုရောက်တိုင်း လူပြောများစရာပါပဲ။
တစ်ဖက်မှာ ဘယ်လိုပဲပြောပြော၊ ဘယ်သူပဲရွေးရွေး၊ ဘယ်နည်းပြပဲကိုင်ကိုင် အင်္ဂလန်ဆိုတာ သမိုင်းအစဉ်အဆက် ခြေရူးအသင်းပါ။ မြန်မာဘောလုံးပရိသတ်နဲ့ နိုင်ငံတကာဘောလုံးပရိသတ် ကိုယ့်နိုင်ငံပြီးရင် အားပေးမှုအများဆုံးအသင်းဖြစ်တာနဲ့အညီ အင်္ဂလန်ကြောင့်နာကျင်ရလွန်းလို့ fan တွေဟာ ရိုးအီနေကြပါပြီ။