ဆရာခွန်သက်တင်ဆန်း
ဆရာနှင့်နေစဥ်ကာလမှာ စနစ်ကျနအောင် သင်ကြားပေးခဲ့ပုံများက လည်း ယခုတိုင် အမှတ်ရနေသည်။ သင်ပြပေးခဲ့ပုံကလည်း ဆန်းပေသကိုး။ စီစစ်ပါများတော့လည်း စစ်စီသလို ဖြစ်သွားရသည်။ စိတ်၏ဆန်းကြယ်မှုနှင့် အတူ အတိတ်၏အရိပ်များဆီသို့ ပြန်ပြောင်းသတိရနေတော့သည်။
တပ်ရင်းမှူးရုံးခန်း။
အစည်းအဝေးရှိလို့ ရုံးခန်းနားတွင် လူတွေစုရုံးစုရုံး ဖြစ်နေကြသည်။ အပတ်စဥ် တနင်္လာနှင့် သောကြာနေ့များတွင် ပြုလုပ်သည့် အစည်းအဝေးသို့ အရာရှိအားလုံးနှင့် အကြပ်ကြီးအဆင့် တာဝန်ခံများအထိ တက်ရောက်ရ သည်။
တပ်ရင်းမှူးရုံးခန်းမှာ သစ်သားများဖြင့် ကာရံထားပြီး ရေနံချေးသုတ် ထားသည်။ ဆရာကတော့ သူနှင့် အရာရှိ စစ်သည်များ တွေ့ဆုံနေမှုအပေါ် ပျော်သလို ခံစားနေရသည်။ စကားများများ ပြောရတော့မှာကိုး။
ဒုတပ်ရင်းမှူး အပါအဝင် အစည်းအဝေး လာတက်ကြသူများမှာတော့ စိတ်ထဲမှာ မပျော်သဖြင့် မျက်နှာမကောင်းစွာ အစည်းအဝေးခန်းထဲ နေရာယူနေကြသည်။ ဘာကြောင့်လဲဆိုတော့ ဝင်စာကြေးနန်းတွေ အားလုံးကို ဆရာ ကိုယ်တိုင် အသေးစိတ် ဖတ်ပြတော့မှာကြောင့်ဖြစ်သည်။
ဝင်စာကြေးနန်းများကို အမှုတွဲကိုင်စာရေးကစပြီး ရုံးအုပ်ကြီး၊ ရေး ထောက်ဗိုလ်ကြီးများ၊ ထောက်လှမ်းရေးအရာရှိ၊ ဌာနချုပ်တပ်ခွဲမှူးနှင့် ဒုတပ်ရင်းမှူးတို့ ဖတ်ပြီးမှသာ တပ်ရင်းမှူးဆီ ရောက်လာရခြင်းဖြစ်သည်။ ပြောရရင် အားလုံးသိပြီးသော အကြောင်းအရာများဖြစ်၏။ ဒါကိုပြန်ဖတ်ပြနေတော့ စိတ်မဝင်စားကြ။
စာများကို ဖတ်ပြရာတွင် စာပါအကြောင်းအရာများကို ဖတ်ပြရင်ဖြင့် တော်ပေဦးမည်။ ခုတော့ စာရွက်ထဲပါသည့် စာသားအားလုံးကို အသေးစိတ် ဖတ်ပြနေတာက အသည်းယား စရာ ကောင်းနေသည်။
ကြေးနန်းစာ တစ်စောင်တွင် အောက်ပါအတိုင်း ရေးသားလေ့ရှိသည်။
" မှတ်ပုံတင်ကြေးနန်းစာပုံစံ(အစား)... ပ(ပေးပိုသူ)။မပခ... လ( လက်ခံသူ)။ ခလရ(၄၇)... စာအမှတ် ၁ဦး၁။ လဝ၂" ဟုရေးသားလေ့ရှိသော စာကို ဆရာမှ အောင်မြင်သော အသံဝါကြီးနှင့် ယခုလို ဖတ်ပြလေတော့ သည်။
" အထက်ဌာနကြေးနန်း...နားထောင်ကြ...မှတ်ပုံတင်ကြေးနန်းစာ ပုံစံ ကွင်းစ အစား ကွင်းပိတ်...ပေးပို့.. ပုဒ်မ.. မပခ... လက်ခံ...ပုဒ်မ...ခ လရ ကွင်းစ လေးဆယ့်ခွန် ကွင်းပိတ်... ၁ဦး၁ ပုဒ်မ လဝ၂ ပုဒ်မ"
တိကျလွန်းပေစွ။ ပုဒ်ထီး ပုဒ်မ ကွင်းစ ကွင်းပိတ်ကအစ အသေးစိတ် ဖတ်ပြနေခြင်းကြောင့် သိပြီးသား အကြောင်းအရာများကို အချိန်ကုန်ခံ ကာ နားထောင်နေကြရသည်။ ကြေးနန်းစာ တစ်စောင်ဖတ်လျင် နာရီဝက်ခန့် ကြာသည်။ စိတ်ရှည်သည်းခံတတ်စေရန် လေ့ကျင့်ပေးနေသည် ဟုပင်ထင်ရ သည်။
ကြေးနန်းဖတ်ပြလို့ အရှိန်ရနေစဉ် တပ်ရင်းမှူး၏ ထိုင်ခုံနောက်ကြော ဖက်က ပြတင်းပေါက် တံခါးမှာ လေတိုက်သဖြင့် နံရံနှင့် တံခါးချပ်တို့ ဝုန်းခနဲ ပြေးဆောင့်သံ ထွက်လာသည်။ တံခါးဂျိတ်များ ချိတ်မထားမိပါလား။
" တပ်ကြပ်ကျော်သာအောင်"
"ရှိ"
ဖတ်လက်စ ကြေးနန်းစာကိုရပ်ပြီး ဗဟိုကင်း ကင်းမှူးကို လှမ်းခေါ် လိုက် သည်။ တပ်ရင်းမှူးရုံးခန်းနှင့် ဗဟိုကင်းက မျက်နှာချင်းဆိုင်ဖြစ်ပြီး လမ်းပဲ ခြားသည်။ ဗဟိုကင်း ကင်းမှူး တပ်ကြပ်ကျော်သာအောင် အပြေးတစ်ပိုင်းနှင့် တပ်ရင်းမှူးရုံးခန်းထဲ ရောက်လာသည်။
" လူလေး... တပ်ရင်းမှူးရုံးခန်း တံခါးပေါက်တွေမှာ တံခါးဖွင့်ပြီးရင် ဘာလုပ်ရမလဲ"
တပ်ရင်းမှူးရုံးခန်း သန့်ရှင်းရေးနှင့် တံခါးအဖွင့်အပိတ် တာဝန်ကို ဗဟိုကင်း ကင်းမှူးက တာဝန်ယူရသည်။
" ဂျိတ်ချိတ်ရပါ့မယ်"
" ပြန်ပြော"
" ဂျိတ်ချိတ်ရပါ့မယ်ခင်ဗျ"
" ခု ချိတ်ထားလား"
ပြတင်းပေါက်က တံခါးကို လက်ညှိုးထိုးပြလိုက်သည်။
" ဟုတ်... မေ့သွားလို့ပါ"
" ငယ်ငယ်ရွယ်ရွယ်နဲ့ မေ့တတ်ကြတာပဲ၊ ဒါဆို မှတ်မိအောင်လို့.. တံခါး ဖွင့်ရင် ဂျိတ်ချိတ်ရမည် ဆိုတာကို ဆယ်ခါဆိုပြီး ဖြုတ်လိုက် တတ်လိုက်လုပ်"
" ဟုတ်ကဲ့... တံခါးဖွင့်ရင် ဂျိတ်ချိတ်ရမည်"
"တစ်"
ဆရာကျော်သာအောင် တံခါးဂျိတ်ကို ပြန်ဖြုတ်ပြီး ပြန်ချိတ်ပြန်သည်။ ပါးစပ်ကလည်း
" တံခါးဖွင့်ရင် ဂျိတ်ချိတ်ရမည်"
" နှစ်"
ရခိုင်သံဝဲဝဲနှင့် ဆရာကျော်သာအောင်က တံခါးဖွင့်ရင် ဂျိတ်ချိတ်ရမည် ဟု တစ်ခါဆိုတိုင်း တပ်ရင်းမှူးမှ လက်ချောင်းလေးများချိုးပြီး " တစ်" "နှစ်" စသည်ဖြင့် အမှတ်စဥ်" တစ်ဆယ်" အထိ မှတ်ပေးနေသည်။
သူငယ်တန်း ကျောင်းသားလေးကို စိတ်ရှည်သော ဆရာမကြီးက စာ သင်ပေးနေပုံနှင့် တူလှပေသည်။ ရယ်ချင်သော်လည်း မရယ်ရဲလို့ အားလုံးရဲ့ မျက်နှာမှာ မချိုမချဥ် အပြုံးစတွေနှင့်။
ကြေးနန်းစာများ ဖတ်ပြပြီးနောက် ဆရာ့ထံမှ စစ်မိန့်သံတစ်ခု ရုတ်တရက် ထွက်ပေါ်လာသည်။
" အားလုံး တန်း...ထ"
ထိုင်နေကြသော အစည်းအဝေး တက်လာသူအားလုံး ဝုန်းခနဲ မတ်တပ်ထရပ်လိုက် ကြသည်။ ပြုံးစိစိ လုပ်တာများ သိသွားလေရော့သလား ဟု စိုးထင့်လျက်။
" ညာ...လှည့်"
ထိုင်ခုံများမှ ညာဖက်ကို လှည့်လိုက်ကြသည်။
" အမြန်လျောက် ဆိုတာနဲ့ ဒုတပ်ရင်းမှူးက ဦးဆောင်ပြီး ရုံးခန်းအပြင် ကော်ရစ်တာ ကိုထွက်မယ်...စစ်မိန့်သံအတိုင်း ဆက်လုပ်မယ်... အ မြန်..လျောက်"
ဒုတပ်ရင်းမှူး ဦးဆောင်သော အစည်းအဝေး စစ်ကြောင်းကြီးဟာဖြင့် ရုံးခန်းအပြင်ဖက် ကော်ရစ်တာဆီသို့ ချီတက်လို့ လာနေပါပြီ။ ရှေ့နောက် ချီတက်နေ၍ တစ်ယောက်တန်း စစ်ကြောင်းရှည်ကြီး ဖြစ်နေသည်။ ပိုးန သန်ကောင်လိုလို ကင်းခြေများလိုလို ပုံစံမျိုးနှင့် တရွေ့ရွေ့လှုပ်ရှားနေကြပြီ။
" ဘယ်ညာ...ဘယ်ညာ"
ဆရာ၏ အမိန့်အတိုင်း လျောက်နေကြသည်။ တပ်ရင်းမှူးရုံးခန်း အပြင်ဖက် ကော်ရစ်တာပေါ်ရောက်ပြီး သစ်သားနံရံဘေး ဖြတ်လျောက်နေစဥ်..
" ရှေ့ဆုံးက ဒုတပ်ရင်းမှူးက ဦးဆောင်ပြီး ကုန်းပြီးလျောက်ပါ"
ဘာကြီးလဲဟလို့ စဥ်းစားနေချိန်မရ။ ရုတ်တရက်တွေဝေသွားကြသော် လည်း ရှေ့ကလုပ်သည့်အတိုင်း ကုန်းပြီးဆက်လျောက်နေကြသည်။
" ကုန်း...ကုန်း.. နည်းနည်းထပ်ကုန်း"
အသက်၈၀ကျော် ခါးကိုင်းနေသည့် အဖိုးကြီးများ တလှုပ်လှုပ်နှင့် ယိမ်းကနေသကဲ့သို့ ဖြစ်နေသည်။ ထိုအချိန် ဆရာ့ဆီမှ အမိန့်တစ်ခု ထပ်ဝင် လာသည်။
" ညာ...ကြည့်"
ခါးကိုင်းထားပြီး ကုတ်ကွကုတ်ကွနှင့် ဘယ်ညာမှန်မှန် လှမ်းနေရာမှ ညာဖက်သို့ လည်ပင်းများကို လိမ်၍ ကြည့်လိုက်ကြသည်။
" လား..လား"
တွေ့ပါပြီ။ ညဖက်ရုံးတွင် ကင်းကျသော စစ်သည်များမှာ တပ်ရင်းမှူး ရုံးခန်းအပြင်ဖက် ကော်ရစ်တာတွင် အိပ်ကြသည်။ ရုံးခန်းနံရံရှိ သစ်သား ချပ် နှစ်ချပ် ထပ်၍ထားသော အကြားတွင် တုတ်တိုများထိုး၍ ခြင်ထောင် ထောင်အိပ်ကြသည်။
ကင်းတာဝန်ပြီးသွားတော့ ခြင်ထောင်သာ ဖြုတ်သွားကြသည်။ တုတ်တို များကိုတော့ ထားခဲ့ကြသည်။ ပျဥ်ပြားနှစ်ခုကြား အောက်ဖက်မှ ထိုးထား၍ လည်း ရုတ်တရက် မမြင်ကြခြင်းဖြစ်သည်။ ခုတော့ ဆရာ့ ကျေးဇူးကြောင့် တွေ့ကြလေပြီ။
လူတန်းကြီးမှာ ကုန်း၍ လည်လိမ်ကာဖြင့် တုတ်တိုများကို ကြည့်ပြီး သောအခါ...
" ရှေ့...ကြည့်"
" ကုန်းနေရာကပြန်မတ်...ဘယ်ညာ..ဘယ်ညာ"
သူ့အမိန့်စဥ်နှင့် သူကတော့ ဟုတ်လို့နေသည်။ တပ်ရင်းမှူး၏ ဘယ် ညာ အမိန့်သံနှင့် အတူ ရုံးခန်းအတွင်း မူလနေရာများသို့ အားလုံးပြန် ရောက် သွားမှ...
" တန်း...ရပ်"
" အားလုံးထိုင်နိုင်ပြီ"
အစည်းအဝေး တက်ရောက်လာသူ အားလုံးလည်း ခါးကြော၊ လည်ချောင်းကြောများ အကြောပြေသွားကြပြီး ချွေးသံတရွှဲရွှဲနှင့် ကိုယ့်နေရာ ကိုယ်ဝင်ထိုင်လိုက်ကြလေသည်။
အစည်းအဝေးခန်း တစ်ခုလုံး တိတ်ဆိတ်နေသည်။ ဆရာဘာပြောမလဲ ဆိုတာကို စောင့်နားထောင်နေကြသည်။
" ကဲ...အားလုံးမြင်ခဲ့ကြပြီ မဟုတ်လား၊ တပ်ရင်းမှူးရုံးခန်းဆိုတာ တပ်ရင်းရဲ့ အထွဋ်အမြတ်နေရာကွဲ့... အခု လူလေးတို့ မြင်ခဲ့ရသလို နံရံ မှာ တုတ်တိုတွေ ထိုးထားတော့ ပနံရပါ့မလားကွဲ့"
" မရပါဘူးခင်ဗျ"
" ဖြစ်ကောဖြစ်သင့်ရဲ့လားဟေ့"
" မဖြစ်သင့်ပါဘူး"
" အေး...နောက်ဆိုမဖြစ်စေနဲ့၊ တာဝန်ရှိသူ အဆင့်ဆင့်ထိန်း"
ပညာသား မပါပေဘူးလားခင်ဗျာ။ အသည်းစွဲအောင်ကို မှတ်မိသွား ကြပါပြီ။ အမိန့်ပေးသူ တပ်ရင်းမှူး၏ အစီအစဥ်အတိုင်း အမိန့်နာခံစွာ လိုက်လံလုပ်ဆောင်ခဲ့ကြသော အရာရှိ စစ်သည်များ ရှိခဲ့သည် ဆိုတာကို ယုံချင်မှတောင် ယုံလိမ့်မည်။ ပါဝင်ခဲ့ကြသူများကတော့ ဒီစာကို ဖတ်ရချိန် မှာ ပြုံးပြီး ပြန်သတိယနေပါလိမ့်မည်။
တပ်ရင်းမှူးရုံးခန်းဘေး အိပ်ခဲ့ကြသည့် ညကင်းအဖွဲ့တွေ နာဖို့သာ ပြင်ပေတော့။
😍😍😍တခါးဖွင့်ရင် ဂျိတ်ချိတ်ရမည်…..☺☺☺