သီးနှံပင်များ ယှဉ်တွဲစိုက်ပျိုး အကျိုးရှိလိုသော်.. (၁)

သီးနှံပင်တွေ အတူယှဉ်တွဲစိုက်ပျိုးခြင်းဟာ  ပိုးမွှားတွေကို တွန်းလှန်နိုင်ပြီး ကျန်းမာသန်စွမ်းတဲ့ အပင်တွေရရှိလာစေဖို့ ကူညီပေးနိုင်တဲ့ သဘာဝစိုက်ပျိုးနည်းစနစ်တစ်ခုဖြစ်ပါတယ်။ 

၁။ ဆေးဖက်ဝင်အပင်များ ထည့်သွင်းစိုက်ပျိုးပါ

များစွာသော အင်းဆက်အဖျက်ပိုးတွေဟာ အနံ့ပြင်းတဲ့ ဆေးဖက်ဝင် ဟင်းခတ်အမွှေးအကြိုင်အပင်တွေကို ကြိုက်နှစ်သက်ခြင်း မရှိကြပါဘူး။ ဒါ့ကြောင့် ဟင်းသီးဟင်းရွက် စိုက်ခင်းတွေကြားမှာ အနံ့ပြင်းတဲ့အပင်တွေကို ထည့်သွင်းစိုက်ပျိုးထားခြင်ဟာ အင်းဆက်အဖျက်ပိုးများစွာကို သဘာဝအတိုင်း တွန်းလှန်နိုင်မှာ ဖြစ်ပါတယ်။ ကြက်သွန်ဖြူ၊ ပင်စိမ်း၊ ပူစီနံ၊ ရို့စ်မေရီ၊ ကလျာဏီ စတဲ့အပင်တွေကို စိုက်ပျိုးထားခြင်းဖြင့် ပက်ကျိ၊ ခူကောင်၊ ပေါက်ဖတ်၊ ကျိုင်းပိုး၊ ဖလံ၊ ပျပိုး၊ ပုရွက်ဆိတ်နဲ့ အခြားပျံသန်းနိုင်တဲ့ အင်းဆက်တွေကို ဟန့်တားနိုင်မှာ ဖြစ်ပါတယ်။ 

၂။ ပန်းပွင်တဲ့အပင်တွေနဲ့ ရောနှောစိုက်ပျိုးပါ

ယခင်ကဆိုရင် အဖော်ပင်စိုက်ပျိုးခြင်းနည်းစနစ်ဟာ မတူညီတဲ့ ဟင်းသီးဟင်းရွက်နဲ့ သီးနှံပင်တွေကို အတူတကွစိုက်ပျိုးခြင်းဖြင့် အပြန်အလှန် အကျိုးပြုနိုင်တယ်ဆိုပြီး လက်ခံခဲ့ကြတာဖြစ်ပါတယ်။ သို့သော်လည်း မကြာသေးမီက လေ့လာမှုတွေအရ အလှစိုက်ပန်းပင်တွေနဲ့ ပန်းပွင့်တဲ့ ဆေးဖက်ဝင် အပင်တွေဟာလည်း သီးနှံတွေစိုက်ပျိုးရာမှာ တွဲဖက်စိုက်ပျိုးဖို့ သင့်တော်တဲ့ အပင်မျိုးစိတ်တွေဖြစ်ကြောင်း တွေ့ရှိခဲ့ကြတာ ဖြစ်ပါတယ်။ 

ဥပမာအားဖြင့် စမုန်စပါး၊ ကလျာဏီ၊ ကြက်သွန်မြိတ် စတဲ့အပင်တွေဟာ ပျားနဲ့ အခြားသော ဝတ်မှုန်ကူး အင်းဆက်တွေကို ဆွဲဆောင်နိုင်တာ ဖြစ်ပါတယ်။ ဒါ့ကြောင့် ဟင်းသီးဟင်းရွက် အပင်များကြားမှာ အဆိုပါ အပင်တွေ ထည့်သွင်းစိုက်ပျိုးထားခြင်းဖြင့် ဝတ်မှုန်ကူးတဲ့ လုပ်ဆောင်ချက်တွေကို တိုးမြင့်စေမှာဖြစ်ပြီး သခွားမွှေးသီးနဲ့ သခွားသီးကဲ့သို့သော အပင်တွေမှာဆိုရင် ပိုမိုထိရောက်ပြီး အထွက်နှုန်းကို မြှင့်တင်ပေးနိုင်မှာ ဖြစ်ပါတယ်။ 

၃။ အကျိုးပြုအင်းဆက်တွေ လာရောက်အောင်ဆွဲဆောင်ပါ

အထက်မှာ ဖော်ပြခဲ့သလိုပဲ ပန်းပွင့်တဲ့အပင်တွေစိုက်ပျိုးထားခြင်းဖြင့် ဝတ်မှုန်ကူးအင်းဆက်တွေသာမက အခြားသော အကျိုးပြုအင်းဆက်တွေကိုပါ ဆွဲဆောင်နိုင်မှာ ဖြစ်ပါတယ်။ ၎င်းအင်းဆက်တွေဟာ အဖျက်ပိုးတွေ ကို ဖမ်းယူစားသောက်မှာဖြစ်တာကြောင့် စိုက်ခင်းမှာ ပိုးသတ်ဆေးအသုံးပြုရတာလည်း လျော့နည်းသွားမှာ ဖြစ်ပါတယ်။ 

ရွှေတဆုပ်ပန်း၊ ထပ်တရာပန်း စတဲ့အပင်တွေဟာ ကပ်ပါးပြုနကျယ်တွေနဲ့ ပျစားယင် စတာတွေကို လာရောက်အောင်ဆွဲဆောင်နိုင်ပြီး ဂေါ်ဖီမှာကျရောက်တဲ့ cabbage loopers နဲ့ အခြားအဖျက်ပိုးတွေကို စားသောက်ဖျက်ဆီးနိုင်တာ ဖြစ်ပါတယ်။ ဒါ့အပြင် ပန်းဂေါ်ဖီစိမ်း၊ ပန်းဂေါ်ဖီနဲ့ မုန်ညှင်း မုန်လာပင်တွေမှာ ကျရောက်တတ်တဲ့ ခူကောင် ပေါက်ဖတ်တွေကိုလည်း ကာကွယ်ပေးနိုင်တာ ဖြစ်ပါတယ်။ အကယ်လို့ သီးနှံစိုက်ခင်းထဲမှာ ပျပိုး ကျရောက်နေတယ်ဆိုရင်တော့ စမုန်စပါး၊ ဇကွဲပန်း (သို့မဟုတ်) ပေါက်ပေါက် ဆုပ်ပန်းနဲ့ တရုတ်နံနံ စတာတွေကို စိုက်ပျိုးထားခြင်းဖြင့် လိပ်ခုံးကျိုင်း တွေကိုဆွဲဆောင်နိုင်မှာဖြစ်ပြီး ပျပိုးတွေကို ကာကွယ်ပေးနိုင်မှာ ဖြစ်ပါတယ်။ 

၄။ မြေဆီလွှာ တိုးတက်ကောင်းမွန်အောင် ပြုလုပ်ပါ

ပဲမျိုးရင်းဝင် အပင်တွေစိုက်ပျိုးခြင်းဖြင့် ၎င်းတို့ရဲ့ နိုက်ထရိုဂျင်ဖမ်းယူနိုင်တဲ့စွမ်းရည်ကြောင့် မြေဆီလွှာကို သဘာဝအတိုင်း တိုးတက်ကောင်းမွန်စေပြီး မြေသြဇာလိုအပ်မှုကိုလည်း လျှော့ချပေးနိုင်မှာ ဖြစ်ပါတယ်။ ပဲပင်တွေကို အခြားသော ဟင်းသီးဟင်းရွက်ပင်တွေနဲ့ တွဲဖက်စိုက်ပျိုးခြင်းဖြင့် အပင်တွေကို ပိုမိုကျန်းမာ သန်စွမ်းစေပြီး မြန်မြန်ကြီးထွားလာစေဖို့ ကူညီပေးနိုင်မှာ ဖြစ်ပါတယ်။ နိုက်ထရိုဂျင်ဓာတ်ဟာ အပင်ပိုင်း ကြီးထွားမှု (အရွက်) အတွက် အသုံးဝင်တဲ့ အာဟာရဓာတ်ဖြစ်တာကြောင့် အရွက်ကိုအဓိကထားပြီးစိုက်ပျိုးတဲ့ အပင်များနဲ့ တွဲဖက်စိုက်ပျိုးခြင်းဖြင့် စိမ်းလန်းစိုပြေတဲ့ အရွက်တွေရရှိလာစေဖို့ ကူညီပေးနိုင်မှာ ဖြစ်ပါတယ်။ အရွက်စားဟင်းသီးဟင်းရွက်တွေအပြင် ပဲပင်တွေနဲ့ တွဲဖက်စိုက်ပျိုးနိုင်တဲ့ အခြားအဖော်အပင်အချို့ကတော့ မုန်လာဥနီ၊ သကြားမုန်လာ၊ တရုတ်မုန်လာ၊ ပြောင်းနဲ့ စတော်ဘယ်ရီ စတဲ့အပင်တွေ ဖြစ်ကြပါတယ်။ 

နောက်ထပ်အကြံပြုချက်(၅) ချက်ကိုတော့ အပိုင်း(၂) မှာ ဆက်လက်ဖော်ပြပေးသွားပါမယ်။

“အစိမ်းရောင်လမ်းမှ ကူးယူဖော်ပြပါသည်”